الأربعاء، 28 أبريل 2010

مقدمة

السلام عليكم ورحمة الله وبركاته

بسم الله الرحمن الرحيم
وبه نستعين والصلاة والسلام على اشرف المرسلين
محمد صلى الله عليه وسلم






اخوانى واخواتى انا حبيت أبدأ أول موضوع فى المدونة دى عن الكلام عن التوحد من وجهة نظر أم وليس من وجهة نظر طبيب نتكلم بصراحة

تشخيص التوحد .. أحيانا بيكون عقبة ودوامة بتدخل فيها الأم والأسرة .. وبتضيع فيها وقت كبير
وبيكون املها الوحيد إنها تسمع كلمة مطمئنة او اى كلمة تنفى إن إبنها عنده توحد .. وحتى ولو كانت بالكذب .. مع إن إحساسها بإبنها بياكدلها إنه فيه شئ غير طبيعى .. وإنه مختلف كتير عن اقرانه من الاطفال او عن إخواته أكيد هى بتكون صدمة وغالبا بتكون غير متوقعة .. او مفاجئة .. بس فى النهاية بتكون واقع لازم التعامل معاه بسرعة وبقوة

وده من وجهة نظرى يتطلب بعض الأشياء


اولها
عدم إنتظار التشخيص الصحيح أو المنتظر لفترة طويلة .. وتضييع وقت ثمين من عمر طفلك .. وإهدار صحتك واعصابك إنتى ووالده .. مجرد ما تحسوا إن طفلكم فيه شئ غير طبيعى ومختلف .. إبداوا فورا فى التركيز على نقط ضعفه وإختلافه ومحاولة تطويرها وإصلاحها وفى نفس الوقت إبحثوا عن التشخيص والعلاج


ثانيا والأهم .. إنكم متحاولوش تتخطوا الصدمة بتجاهل وكأن شئ لم يحدث ومحاولة عدم إظهار الصدمة او الضعف .

بالعكس من الصحى جدااا لينا إننا ناخد وقتنا فى الصدمة علشان نقدر نخرج منها اقوياء ومترجعلناش تانى بنفس القوة فى اى وقت نضعف فيه.. بس لازم نتمسك بحدود ما شرعه الله لنا علشان ننول رحمته وعونه لينا فيما اصابنا .. نبتعد عن كل ما يغضب الله فى التعبير عن مصيبتنا .. إنما نهدا ونبكى وندعوا وناخذ قسط من الوقت للتفكير مفيش منه اى ضرر دى مرحلة لابد من المرور بيها للترويح عن النفس وبتكون مرحلة مؤقتة


اكيد هى مصيبة (وقل لن يصيبنا إلا ما كتب الله لنا ) وربنا إبتلانا بهذا الشئ للإختبار وزى ما ربنا ميزنا عن غيرنا بهذه المنحة اللى أخدت شكل المحنة بالنسبالنا ... ربنا عالم بتصرفتنا ومطلع على ردود افعالنا إللى من الأفضل لينا ولأولادنا إنها تكون الصبر والدعاء .. اللهم أجرنا فى مصيبتنا وأخلفنا خيرا منها .. والدعاء بالصبر .. وأن يدبر الله لنا امرنا .. وصلاة الإستخارة قبل القدوم على اى خطوة فى علاج اولادنا


ثالثا .. التاكد بأن الأمومة الصادقة هى اول رصاصة فى قلب التوحد بتشل حركته وتطوره .. مهما قالوا الاطباء ومهما انشئت مراكز للعلاج وتعديل السلوك إللى مفيش غنى عنها .. إلا إن مفتاح الطفل بيظل فى إيد امه .. وقلب الأم هو أهم دليل بيرشد الأم لإحتياجات إبنها والأم هى الإنسانه الوحيدة المؤمنة بقدرات إبنها وحاسة بيه .. وتملك أعظم سلاح وهو الدعاء الصادق الخالص المستجاب بإذن الله


رابعا .. رسالة إلى كل أب . وقوفك بجانب إبنك مهم جدااا بس صدقنى الأهم هو وقوفك بجانب زوجتك ... لأنها فى الفترة دى بتكون اكثر مرض من إبنها ... بتشعر باكثر مما يشعر إبنها وبتتالم نفسيا واحيانا جسديا .. وبيكون مطلوب منها إنها تكون الأم والطبيبة والزوجة .. وبيتنسى انها بتتالم ومحتاجة إللى يحس بيها ويساندها علشان تقدر تكمل ومحدش يقدر يقوم بالدور ده اكثر من الاب والزوج وشريك حياتها .. ومتنساش إنك فى نفس الإختبار معاها ولازم يكونلك دور حتى وإن كانت قدراتك وطبيعتك مش هتأهلك بإنك تقوم بنفس دورها .. وطبيعتك مش بتخليك تقدر على الإستمرار زيها بدون ملل لفترات طويلة .. لأن مفيش إنسان زى الأم ابدا ويقدر يعمل إللى بتعمله .. إنما كلمة شكر منك وتشجيع .. ووقت منك تسمع فيه شكواها وتهون عليها ببعض الكلمات وتبث فيها الثقة والتفاؤل هيكونله مفعول السحر عليها وبالتالى هينعكس على إبنك إللى أكيد يهمك شفاءه زيها بالظبط


خامسا .. محاولة تثقيف انفسكم قدر المستطاع عن التوحد واعراضه وطرق علاجه سواء الدوائية او الحمية او التدريبات والبدء فى العلاج السلوكى فورا .. وعدم البدء فى اى علاج دوائى او حمية إلا بعد إستشارة طبيب مختص وعمل التحاليل والأشعات اللازمة ..


سادسا ... الحمد لله التوحد مجرد مرض .. وما خلق الله داء إلا وله دواء علمه من علم وجهله من جهل الحمد لله .. حصل تطورات كتير فى مجال التوحد وطرق علاجه وإن كانت كثيرة وطويلة إلا إن الدعاء وصلاة الإستخارة والتأنى والتوكل على الله فى كل شئ بإذن الله وحده هيقصر من الطريق ... والإكتشاف المبكر وعدم الإهمال من اهم الأمور إللى بتعجل بإذن الله بالشفاء التام إللى أصبح كتير بفضل الله وحده وكرمه ... اطفال كتير الحمد لله بيشفوا منه شفاء تام .. لم يعد معجزة صعبة الحدوث



المهم التوكل على الله ثم البدء فورا


أنا عملت المدونة دى خصيصا فى الموضوع ده لمساعدة الامهات الجدد إللى مازالوا فى اول الطريق ومحتاجين الدليل .. إن شاء الله ربنا يوفقنى وأقدر اخدمكم بنقل خبرتى وخبرة غيرى من الأمهات ... واول شئ نويت ابدا بيه حاسة إنه بإذن الله هيساعدكم كتير فى اول الطريق .. هو طريقة سن رايز ......... وهى طريقة فى العلاج السلوكى للتوحد ... هعتمد فى كتابتها على ترجمة الأخت ام عادل فى منتدى تحدى الإعاقة لفديوهات ومحاضرات عن هذه الطريقة

www.t7di.net

وإن شاء الله هحاول إختصارها وترتيبها ووضع كل فيديو مع ترجمته لتسهيل الامور واسال الله رب العالمين ان ينفعكم بهذا الكلام وان يجعل عملى لوجهه خالصا .. واسألكم الدعاء






هناك تعليقان (2):

  1. الأنشودة رائعة ..........
    وأنت الأروع من خلال طرحك للموضوع وصدقيني أختي الحبيبة لم يتأثر ويشعر ويقشعر جسد وعقل إلا من لديه طفل توحدي لأن لا أحد يستطيع معرفتهم ويشعر بما يعانون أفرادهم أكثر منهم إلا من عانى ..........
    سلمت يداكِ وسلم فكرك وعقلك وجهدك وأسأل الله أن يكتبه في ميدان حسناتك ... جعلتني أشعر بأنه لا بد لي أن افعل شيئاً لأعرف بها الاضطراب الغريب

    ردحذف
  2. راقية المشاعر

    جزاكى الله كل خير على تعليقك وكلماتك الجميلة .. سبحان الله انا قبل ما اكتشف فى بنتى أى شئ كنت مهتمة جدااا بالتوحد وعايزة اعرف عنه كل شئ لأنه مرض غامض ومحير وأصحابه بتشعرى إن جواهم خير كتير لكن محتاجين إللى يساعدهم على إظهاره

    وده إللى ساعدنى فى إكتشافه عند بنتى مبكرا والحمد لله هى فى تحسن مستمر أتمنى لها الشفاء التام هى وكل اطفال المسلمين

    ردحذف